सयौं किलो माछा नष्ट

 

वालिङ ।

स्याङ्जा जिल्लाका प्रमुख व्यापारिक केन्द्र स्याङ्जा बजार र वालिङ बजारमा अवैध रूपमा माछा बिक्री–वितरण गर्दै आएका दुई भारतीय नागरिकका पसल प्रहरीले सिल गरेको छ। गोप्य सूचनाका आधारमा गरिएको संयुक्त अनुगमन तथा चेकजाँचका क्रममा अखाद्य र अवैध रूपमा भण्डारण तथा बिक्री भइरहेको माछा फेला परेपछि जिल्ला प्रहरी कार्यालय स्याङ्जाले दुवै पसललाई तत्काल बन्द गराएको हो। जिल्ला प्रहरी कार्यालय स्याङ्जाका निमित्त सूचना अधिकारी, प्रहरी निरीक्षक सागर कार्कीका अनुसार भारतीय नागरिक राम पुकार गुप्ता र डोमा साहका पसलमा ठूलो मात्रामा अखाद्य तथा अवैध रूपमा ल्याइएका माछा भेटिनुका साथै आवश्यक कागजात तथा स्वीकृति विना व्यापार सञ्चालन गरिरहेको पुष्टि भएको थियो। कार्कीले भने, “अनुगमनका क्रममा उनीहरूले भण्डारण गरेको माछा मानवीय उपभोग योग्य नरहेको देखिएकोले सबै नष्ट गरिएको छ ।”

गोप्य सूचनाको आधारमा संयुक्त टोलीको अनुगमन

अवैध तथा अखाद्य माछा बिक्री भइरहेको भन्ने गोप्य जानकारी प्राप्त भएपछि जिल्ला प्रहरी कार्यालय, वडा प्रहरी कार्यालय वालिङ र पशु सेवा शाखा वालिङबाट खटिएको संयुक्त टोलीले दुई ठाउँमा एकैसाथ चेकजाँच सञ्चालन गरेको थियो। स्याङ्जा बजार र वालिङ १० स्थित दुईवटा पसलमा गरिएको अनुगमनका क्रममा दुवै व्यवसायीले बजारमा माछा बिक्री गर्न आवश्यक अनुमति नलिएको र स्वच्छता तथा मापदण्डविपरीत बिक्री गरिरहेको पाइएको प्रहरीको भनाइ छ। अनुगमन टोलीले स्याङ्जा बजारमा राम पुकार गुप्ताले भण्डारण गरेको १८ केजी वसा प्रजातिको माछा उपभोगयोग्य नभएको ठहर गर्दै तत्काल नष्ट गरिदिएको छ। त्यसैगरी वालिङमा सञ्चालित भकुण्डे माछा पसलमा भेटिएका बैखी तथा पगाम प्रजातिका माछा पनि आबद्ध अधिकारीहरूले शंका योग्य अवस्थामा फेला पारेका थिए।

दश वर्षभन्दा बढी समयदेखि अवैध कारोबार

प्रहरीका अनुसार ३३ वर्षीय भारतीय नागरिक राम पुकार गुप्ता करिब १०–१२ वर्षदेखि स्याङ्जामा माछा बिक्री गर्दै आएका थिए। विगतदेखि नै अवैध रूपमा कारोबार गर्दै आएको आशंका भए पनि पछिल्लो समयमा प्राप्त विश्वसनीय सूचनापछि मात्र टोली गठन गरी अनुगमन गरिएको प्रहरी निरीक्षक कार्कीले बताए। गुप्ताले पुतलीबजार–१, स्याङ्जा बजारमा लामो समयदेखि अनुमति विना माछा बिक्री–वितरण गर्दै आएका थिए। अनुगमनका क्रममा गुप्ताका पसलमा भेटिएका माछा ताजा नभएको, सही तरिकाले भण्डारण नगरिएको र गुणस्तरहीन रहेको पाइएको प्रहरीले जनाएको छ। स्थानीयवासीले पनि लामो समयदेखि उक्त पसलको माछा खरिद गर्दा दुर्गन्ध आउने, कहिलेकाहीं बिग्रिएको जस्तो देखिने गरेको गुनासो प्रहरीलाई दिएको बताइन्छ।

वालिङमा डोमा शाहको पसलबाट अखाद्य माछा बरामद

अर्का भारतीय नागरिक डोमा शाहले वालिङ–१० मा कर्णबहादुर सार्कीको घरमा ‘भकुण्डे माछा पसल’ सञ्चालन गर्दै आएका थिए। अनुगमनको क्रममा शाहको पसलमा राखिएको माछा ‘अखाद्य जस्तो’ अवस्थामा भेटिएको प्रहरीले जनाएको छ। भेटिएको बैखी र पगाम प्रजातिका माछाको नमूना संकलन गरी परिक्षणका लागि पोखरा पठाइएको छ। प्रहरी निरीक्षक कार्कीले भने, “नमुना परिक्षण प्रतिवेदन नआएसम्म पसल सिल गरिएको छ। प्रतिवेदन आएपछि थप आवश्यक कानूनी कारबाही अघि बढाइनेछ ।”

अवैध व्यापारमा कडाइ गर्दै प्रहरी

स्याङ्जामा पछिल्लो समय अखाद्य सामग्री तथा अनुमति विना सञ्चालन हुने व्यावसायिक क्रियाकलापमाथि प्रहरीले कडाइ गरेको बताएको छ। विशेष गरी विगत केही महिनायता बजार अनुगमनमा अवैध मासु, माछा तथा अन्य अखाद्य पदार्थ भण्डारण गर्नेहरूलाई कारबाही गरिएको प्रहरीको भनाइ छ। कार्कीका अनुसार उपभोक्ताको स्वास्थ्य सुरक्षा प्राथमिकतामा राख्दै प्रहरीले स्थानीय तहसँगको सहकार्यमा नियमित चेकजाँचलाई तीव्रता दिएको छ। उनले भने, “बजारमा बिक्री हुने खाद्य सामग्री सुरक्षित हुनु अत्यन्त महत्वपूर्ण छ। कुनै पनि ठाउँमा शंका लागेमा उपभोक्ताले प्रहरीलाई जानकारी गराउनुपर्छ ।”

स्थानीयको स्वागतयोग्य कदम

स्थानीयवासी तथा व्यापारीहरूले पनि अवैध कारोबार नियन्त्रणमा प्रहरीले गरेको कदमको स्वागत गरेका छन्। लामो समयदेखि बजारमा गुणस्तरहीन तथा स्वच्छताविहीन माछा बिक्री भइरहेको गुनासो गर्दै आएका व्यवसायी संघका प्रतिनिधिहरूले उपभोक्ताको स्वास्थ्य नै जोखिममा परेको हुँदा यस्तो कार्वाहीले बजार प्रणाली सुधारमा सहयोग पुग्ने बताएका छन्।

थप अनुसन्धानको तयारी

दुवै पसल सिल गरिएको र नष्ट गरिएको माछाको विवरण जिल्ला प्रहरी कार्यालयले अभिलेखीकरण गरिरहेको छ। नमूना परिक्षणका प्रतिवेदन आएपछि आवश्यक कानूनी प्रावधानअनुसार दुवै व्यवसायीमाथि मुद्दा चलाइने प्रहरीको भनाइ छ। यस घटनाले अवैध तथा अखाद्य सामग्री बिक्री गर्ने व्यवसायीमाथि कडाइ आवश्यक रहेको स्पष्ट पारेको छ। प्रहरीले बजार अनुगमनलाई अझ सघन बनाइने र उपभोक्तालाई सुरक्षित खाद्य सामग्री उपलब्ध गराउन स्थानीय तहसँग सहकार्य जारी रहने जनाएको छ।

प्रतिक्रिया

सबै

पुतलीबजारमा चैत ५ देखि ‘मेयर कप’ भलिबल

सबै

पुतलीबजारमा चैत ५ देखि ‘मेयर कप’ भलिबल

नेपाल अपडेट

MENU