ओलीका बलिया खम्बाहरू नै पराजयको शिकार
काठमाडौं ।
गत मङ्सिर ४ मा भएको प्रतिनिधिसभा सदस्य निर्वाचनमा प्रमुख प्रतिपक्षी दल नेकपा एमालेभित्र पार्टी अध्यक्ष केपी शर्मा ओलीका विश्वास पात्रहरूको पराजय भएको छ । ओलीका सबैभन्दा नजिक रहेर पार्टीको उपल्लो तहमा बसेका ‘हेभिवेट’ भनिएका नेताहरू नै पराजित भएका हुन् । एमाले अध्यक्ष ओलीको सबैभन्दा नजिक रहेर पार्टी कार्यकर्ता परिचालन गरिदिने महेश बस्नेतदेखि पार्टीका वरिष्ठ उपाध्यक्ष ईश्वर पोखरेलसमेतले हार व्यहोर्नुपरेको छ । काठमाडौं–५ मा एमालेको विरासत धान्दै आएका वरिष्ठ उपाध्यक्ष पोखरेल यसपटक नेपाली कांग्रेसका युवा नेता प्रदीप पौडेलसँग पराजित भए । पहिलोपटक प्रतिनिधिसभामा सदस्यमा उम्मेदवारी दिएका कांग्रेस नेता पौडेलले पोखरेललाई ५ हजार ९८ मतान्तरले पराजित गरे ।
पार्टीले तनहुँमा टिकट व्यवस्थापन गर्न नसकेपछि जुनसुकै क्षेत्रमा पनि चुनाव लड्ने आँट गरेर आएका युवालाई काठमाडौं–५ का मतदाताले पत्याएका छन् । काठमाडौं ५ का जनता कसैका नभई स्वतन्त्र निर्णय गर्न सक्ने क्षमताका भएको र मतदाताको क्षमतासँग कांग्रेसका उम्मेदवारको पनि क्षमता मिल्ने भएकाले पौडेललाई जित हासिल गर्न सहज भएको बुझाइ छ । यस क्षेत्रलाई आफ्नो विरासत ठान्दै आएका पोखरेलले पटक–पटक सत्तामा बसेर देश र नागरिक प्रतिकूल र आफू अनुकूल हुने गरी काम गरेको आरोप खेप्दै आएका थिए ।
पार्टीको दोस्रो वरीयता क्रममा रहेका पोखरेल ओलीको उत्तराधिकारी बन्ने लाइनमा थिए। त्यस्तै, एमालेका महासचिव शंकर पोखरेलले दाङ क्षेत्रनम्बर २ बाट १ सय ९७ मतान्तरले निर्वाचन हारे । पार्टीको उच्च तहको जिम्मेवारीमा रहेका पोखरेललाई सत्ता गठबन्धनका साझा उम्मेदवार नेकपा माओवादी केन्द्रकी नेता रेखा शर्माले हराईन् । शर्माले २६ हजार ८ सय ७७ मत प्राप्त गर्दा पोखरेलले २६ हजार ६ सय ८० मत पाएका थिए । ओलीकै नजिक रहेर सत्ता र पार्टीभित्र पटक–पटक अवसर पाइसकेका पोखरेल सञ्चारमन्त्री र मुख्यमन्त्रीसमेत भैसकेका थिए । उनको पराजयले ओलीलाई सत्ता यात्रामा चुनौती थपिएको राजनीतिक विश्लेषकहरू बताउँछन् ।
अध्यक्ष ओलीको सबैभन्दा प्रियपात्र बनेका नेता महेश बस्नेत पनि यो पटक संसद् छिर्न पाएनन् । युवासंघको नेतृत्वमा आउँदादेखि नै ओलीका हरेक राजनीतिक गतिविधिलाई नजिकबाट साथ दिँदै आएका बस्नेतले भक्तपुर क्षेत्र नं. २ बाट पराजय व्यहोर्नुप¥यो । उनले २०७० सालमा चुनाव हारे पनि २०७१ भदौदेखि २०७२ असोजसम्म उद्योगमन्त्री भएर काम गरेका थिए । उनले एमाले–माओवादी केन्द्रबीच वाम गठबन्धन भएको २०७४ सालको आम निर्वाचनमा भक्तपुर–२ क्षेत्रमा कांग्रेसका उम्मेदवार दमननाथ ढुंगानालाई पराजित गरेका थिए । बस्नेत अहिले सोही निर्वाचन क्षेत्रबाट सत्ता गठबन्धनका उम्मेदवार नेपाली कांग्रेसका नेता दुर्लभ थापासँग पराजित भए। थापाले २३ हजार ५ सय मत पाउँदा बस्नेतले २२ हजार ६ सय ७७ मत पाए । संसद्मा बस्नेतको अनुपस्थितिले केपी ओलीलाई सत्ता निर्माणको संसदीय खेलमा घाटा पुग्ने एमालेकै नेताहरू बताउँछन् ।
ओलीका अर्का विश्वास पात्र प्रदेशनम्बर–१ का पूर्व मुख्यमन्त्री तथा पूर्वसञ्चारमन्त्री शेरधन राईलाई यो पटक संसद् छिर्न नेकपा माओवादी केन्द्रका नेता सुदन किरातीले रोक लगाए । भोजपुरबाट सत्ता गठबन्धनका साझा उम्मेदवार किरातीले १९ हजार ४ सय ८५ मत लिएर निर्वाचित हुँदा शेरधनले १७ हजार ५ सय ८१ मत पाए । पार्टी अध्यक्ष ओलीले गरेका हरेक निर्णयका पक्षमा खरो उत्रने राईले प्रदेशको नामकरण समेत गर्न नसकेको आरोप खेप्दै आएका थिए ।
ओलीकै आडमा बसेर पटक–पटक सत्ताको स्वाद लिएका राईले पार्टी र नागरिकप्रति भन्दा बढी ओलीप्रति उत्तरदायी बन्ने गरेको आरोप एमालेकै एकाथरि कार्यकर्ताहरूले लगाउँदै आएका थिए । पार्टी अध्यक्ष ओलीको विदेश विभागसँग सम्बन्धित सबै काम धानेर बसेका राजन भट्टराई पनि यो संसद्मा नदेखिने भएका छन् । भट्टराई नेपाली कांग्रेसका महामन्त्री गगन थापासँग भारी मतान्तरसहित पराजित भए। थापाले २१ हजार ३ सय २ मत ल्याउँदा एमालेका भट्टराईले १३ हजार ८ सय ५५ मत पाएका थिए ।
त्यस्तै, खोटाङबाट विशाल भट्टराईको पराजयले पनि ओलीलाई घाटा पुगेको छ । संसद्मा ओलीका पक्षमा कडा रूपमा उत्रने पात्रमध्ये विशाल पनि एक हुन् । उनी खोटाङबाट प्रतिनिधिसभा सदस्यमा गठबन्धनका साझा उम्मेदवार माओवादी केन्द्रका राजकुमार राईसँग पराजित भए । राईले ३१ हजार ३ सय ५१ मत ल्याउँदा भट्टराईले २८ हजार ६८ मत पाए । ओली निकट मानिने अर्का नेता ऐन महर पनि बझाङमा गठबन्धनका उम्मेदवार नेकपा एकीकृत समाजवादीका भानुभक्त जोशीसँग पराजित भए । जोशीले २८ हजार १ सय ४३ मत ल्याउँदा महरले २७ हजार १ सय ४५ मत पाए । ओलीका विश्वास पात्रसँगै पार्टी सचिव लेखराज भट्ट, सुरेन्द्र पाण्डेलगायतका पदाधिकारीहरू समेत यसपटक संसद्मा आउन सकेनन् । यसले एमालेलाई संसदीय उपस्थितिमा कमजोर बनाउनुका साथै सरकार गठनमा समेत असर पर्ने देखिएको छ ।
यो निर्वाचनमा एमाले नेतृत्व तहमा बसेका प्रायः नेताहरूले हार्नुको पछाडि पार्टी अध्यक्ष ओलीको एकाधिकारवाद भएको स्वयं एमाले कार्यकर्ताहरू नै बताउँछन् । यद्यपि, ओलीलाई नजिकबाट सहयोग गर्ने, उहाँका सबै निर्णयलाई पार्टी पंक्तिमा हुबहु कार्यान्वयन गराउन निरन्तर लागि पर्ने र पार्टीभित्र तथा बाहिरका प्रतिपक्षहरूलाई तल्लो स्तरमा झरेर आलोचना गर्ने गोकुल बाँस्कोटा र सूर्य थापाले चुनाव जितेका छन् । ओलीलाई आगामी संसद्मा थापा र बाँस्कोटालगायतका केही पात्रले सहयोग गरे पनि महत्वपूर्ण र विषयगत क्षेत्रमा दख्खल राख्ने ओलीका मुख्य खम्बाहरू नै ढलेपछि ओलीलाई आगामी सत्ता समीकरणमा समेत असर पर्ने देखिन्छ ।
ओलीका पक्षमा बलियोसँग उभिने नेताहरूको पराजयले आगामी सदन र सरकारमा ओलीलाई चुनौती थपिएको विश्लेषण गर्दै राजनीतिक विश्लेषक शंकर तिवारीले सुझाव दिए– ‘विगतमा सर्वभौम संसद्मा देखिएको ओली प्रवृतिलाई मलजल गर्ने एमालेका नेताहरूलाई जनताले यसपटक अनुमोदन नगरेर ओलीलाई पनि सच्चिने मौका दिएकाले यो जनअभिमतलाई ओलीले कार्यशैली परिवर्तनको अवसरको रूपमा लिनुपर्छ ।’
नेपाल अपडेट
-
‘नीतिगत र दीर्घकालिन अभावले व्यवसायीहरु समस्या भोग्न बाध्य छन्’
-
महायज्ञ : ज्ञान कि धन ?
-
चुनाबमा गरेका बाचा अनुसारको काम सम्पन्न हुदैंछ
-
सम्पादकीय— सुरक्षित खानेपानीको पहल
-
सम्पादकीय— सहकारीहरुको जवाफदेहिता खै !
-
‘नेपाल प्रहरी नागरिकको सारथी हो’
-
वालिङ नगरको सफल कार्यक्रम—‘कृषि उद्यमशीलतामा नागरिकलाई जोड्ने परियोजना’
-
‘नेतृत्वमा दिर्घकालिन सोच भएन भने लोकतन्त्र कमजोर बन्छ’
-
राजमार्गमा उखुको जुस बेच्दै अनिल, स्वदेशमै सुन फलाउने उदाहरणीय युवा ।
-
महोत्सवको चहलपहल— पिंक सिटी महोत्सवले वालिङको पहिचान खोज्दै
प्रतिक्रिया