एकद्वार प्रणाली लागू भए पनि प्रशासनिक सेवा प्रवाहप्रति सेवाग्राही असन्तुष्ट
स्याङ्जा ।
जिल्ला प्रशासन कार्यालय, स्याङ्जामा सेवाग्राहीको सहजताका लागि एकद्वार प्रणाली लागू गरिए पनि सेवा प्रवाह अझै सेवाग्राहीमैत्री बन्न नसकेको गुनासो गरिएको छ। कार्यालयमा सेवा लिन पुग्ने केही सेवाग्राहीले कर्मचारीको व्यवहार र कार्यशैलीप्रति असन्तुष्टि जनाउँदै सेवा प्रवाहमा सुधार आवश्यक रहेको बताएका छन्। सेवा लिन कार्यालय पुग्दा आवश्यक प्रक्रिया र कागजातबारे स्पष्ट जानकारी नदिने, सामान्य कामका लागि पनि पटक–पटक कार्यालय धाउनुपर्ने तथा कर्मचारीले विनाकारण सेवाग्राहीलाई झुलाउने गरेको उनीहरूको गुनासो छ। कतिपय अवस्थामा आवश्यक सहयोग र सहजीकरण गर्नुको सट्टा कर्मचारीबाट रूखो बोली र असहयोगी व्यवहार हुने गरेको सेवाग्राहीको भनाइ छ।
सरकारी कार्यालयमा प्रविधिको प्रयोग र सेवा प्रवाहलाई व्यवस्थित गर्ने उद्देश्यले विभिन्न सुधारका प्रयास भइरहे पनि सेवाग्राहीसँग गर्ने व्यवहारमा भने अपेक्षित परिवर्तन आउन नसकेको उनीहरूको गुनासो छ। एकद्वार प्रणालीले सेवाग्राहीलाई एउटै स्थानबाट आवश्यक सेवा उपलब्ध गराउने तथा अनावश्यक झन्झट कम गर्ने अपेक्षा गरिए पनि व्यवहारमा अझै पुरानै शैली दोहोरिएको सेवाग्राही बताउँछन्। सेवा लिन आउने नागरिकलाई सहयोग गर्नुको सट्टा एउटा कोठाबाट अर्को कोठामा पठाउने, के गर्नुपर्ने हो स्पष्ट नभन्ने र सामान्य कामका लागि पनि लामो समय कुर्नुपर्ने अवस्था छ, एक सेवाग्राहीले गुनासो गरे। कर्मचारीको व्यवहारमा सुधार नआएसम्म प्रणाली परिवर्तन मात्रले सेवा प्रवाह प्रभावकारी बन्न नसक्ने उनको भनाइ छ।
सेवाग्राहीले सरकारी कार्यालयमा आउने प्रत्येक नागरिकलाई सम्मानपूर्वक व्यवहार गर्ने, आवश्यक सूचना तथा प्रक्रियाबारे स्पष्ट जानकारी दिने र सकेसम्म एउटै स्थानबाट सेवा उपलब्ध गराउने व्यवस्था प्रभावकारी रूपमा कार्यान्वयन गर्नुपर्ने माग गरेका छन्। विशेषगरी नागरिकता, राष्ट्रिय परिचयपत्र, राहदानीलगायतका प्रशासनिक सेवा लिन दैनिक ठूलो संख्यामा सेवाग्राही जिल्ला प्रशासन कार्यालय पुग्ने गरेका छन्। ग्रामीण क्षेत्रबाट लामो दूरी तय गरी सेवा लिन आउने नागरिकले सानो कमजोरीका कारण पटक–पटक कार्यालय धाउनुपर्दा समय र खर्च दुवै बढ्ने गरेको गुनासो छ।
सेवाग्राहीले कार्यालयको भौतिक संरचना वा प्रणालीमा मात्र नभई कर्मचारीको व्यवहार र कार्यशैलीमा समेत सुधार आवश्यक रहेको बताएका छन्। नागरिकलाई ‘सेवा पाउने व्यक्ति’ नभई ‘सेवा लिन आउने नागरिक’ का रूपमा सम्मानजनक व्यवहार गर्नुपर्ने उनीहरूको माग छ। जिल्ला प्रशासन कार्यालयबाट प्रवाह हुने सेवामा पारदर्शिता, छिटोछरितो सेवा, सूचना प्रवाह र कर्मचारीको जिम्मेवारीबोध बढाउन सके मात्र एकद्वार प्रणालीको उद्देश्य पूरा हुने सेवाग्राहीको अपेक्षा छ। त्यसका लागि कार्यालयले सेवाग्राहीका गुनासा सुन्ने प्रभावकारी संयन्त्र निर्माण गरी कर्मचारीको कार्यशैली र व्यवहारमा नियमित निगरानी गर्नुपर्ने आवश्यकता देखिएको छ।
नेपाल अपडेट
-
बजेट खर्च हुनु मात्रै विकास होइन, प्रतिफल देखिनुपर्छ
-
सुशासनसहित समृद्ध भीरकोट निर्माणमा प्रतिबद्ध छौँ
-
विकासले भू–दृश्य मात्र होइन, इतिहास पनि बदल्छ
-
मनसुनजन्य विपद्को सामाना गर्न पूर्ण तयारीमा छौ
-
प्रकाशकीय— १३ वर्षको यात्रा : सत्य र जनविश्वासको निरन्तर अभियान
-
वालिङ उद्योग वाणिज्य संघको नेतृत्वमा अनुपमा तिवारी
-
सम्पादकीय— ‘बजेटमा जनअपेक्षा’
-
फुटको होइन, एकताको दबाब सिर्जना भइरहेको छ
-
गल्याङमा कृषि बजार संचालन
-
स्याङ्जामा हुट र छत राखेका सवारीसाधनलाई निशेध
प्रतिक्रिया