किसानलाई दुधमा प्रति लिटर चार रुपैयाँ अनुदान
स्याङ्जा ।
स्याङ्जाको आँधीखोला गाउँपालिकामा दूध सङ्कलन केन्द्र स्थापना गरिएको छ। कृषकको उत्पादन, पालिकाको सहयोग र सहकारीको बजारीकरण हुने अवधारणा अनुसार गाउँपालिकाको कार्यालय परिसरमा दूध संकलन केन्द्र स्थापना गरिएको पालिकाको जनाएको छ। बाङ्सिङ साना कृषि सहकारी संस्था लिमिटेडसँगको सहकार्यमा पालिकाले उत्पादनमा आधारित अनुदानस्वरूप कृषकलाई सीधा सहयोग पुर्याउने तयारी गरेको हो । गाउँपालिकाको सहयोगमा र बाङ्सिङ साना कृषि सहकारी संस्था लिमिटेडले बजारीकरण गर्नेगरी दूध संकलन केन्द्र सञ्चालनमा ल्याइएको हो । सहकारीले किसानबाट दैनिक उत्पादन हुने दूध सङ्कलन गरेर केन्द्रमा राख्नेछ । त्यही तथ्याङ्कका आधारमा पालिकाले दूधमा प्रति लिटर चार रुपैयाँ अनुदान वितरण गर्ने व्यवस्था मिलाएको छ ।
गाउँपालिकाका छ वटा वडाबाट हाल दैनिक करिब १ हजार लिटर दूध सङ्कलन भइरहेको गाउँपालिका अध्यक्ष विश्व पौडेलले जानकारी दिए । गाउँमै उत्पादन हुने दूध एकै ठाउँमा सङ्कलन र वितरण हुने भएपछि किसानलाई बिक्रीका लागि अन्यत्र धाउनुपर्ने झन्झट कम हुने र आम्दानी बढ्ने अध्यक्ष पौडेलको विश्वास छ । दूध सङ्कलन केन्द्र स्थापनासँगै किसानहरू व्यवसायप्रति थप आकर्षित भएको गाउँपालिका अध्यक्ष पौडेलले बताए । “किसानलाई सहज बनाउने उद्देश्यले केन्द्र सञ्चालनमा ल्याएका हौं, गाउँमै उत्पादन भएको दूध गाउँमै बिक्री हुँदा कृषकलाई ठूलो राहत पुग्नेछ,” अध्यक्ष पौडेलले थपे ।
गाउँपालिका अध्यक्ष पौडेलले सङ्कलन केन्द्र सञ्चालनमा आएपछि किसान विचौलियाबाट ठगिने प्रवृत्ति घट्ने भन्दै उत्पादन, प्रशोधन र बजार विस्तारमा सहकारीले महत्वपूर्ण भूमिका खेल्ने विश्वास व्यक्त गरे । पौडेलले आवश्यकताअनुसार पोखरामा छुट्टै बिक्री कक्ष सञ्चालन गर्ने तयारी समेत भइरहेको जानकारी दिए । पालिकाले पाँच हजार लिटर क्षमता भएको चिलिमे भ्याट, पाँचवटा मिल्क एनालाइजर, पाँचवटा डिफ्रीज र ५० थान दूध क्यान उपलब्ध गराएर केन्द्रलाई पूर्ण रूपमा सञ्चालनयोग्य बनाएको छ । पालिकाले कृषकलाई एकीकृत गर्दै कृषि तथा पशुपालनबाट आयआर्जन बढाउने अभियान सञ्चालन गरिरहेको छ । किसानलाई उत्पादन, प्रशोधनदेखि बजार विस्तारसम्म सहज गराउने उद्देश्यसहित सुरु गरिएको दूध सङ्कलन केन्द्रले गाउँमा दुध व्यवसाय प्रति नयाँ आशा समेत जगाएको छ ।
नेपाल अपडेट
-
‘कृषिमा आत्मनिर्भर बनाउन बजारको सुनिश्चितता आवश्यक’
-
भूपू विद्यार्थीको पुर्णामृत स्कुलमा सहयोग
-
सम्पादकीय— ‘भीरकोटका क्याम्पसलाई बचाऔं’
-
समावेशी विकास र पारदर्शिताको बाटोमा अर्जुनचौपारी
-
मानिस हराएको सूचना
-
कृषिमा न्यून बजेट— ‘स्याङ्जामा छुट्टाइएको बजेट खर्चमै समस्या’
-
भीरकोटमा शतप्रतिशत योजनाको काम
-
अमोर वालगृह न्यानो काखको खोजीमा आएका बाबुनानीहरुको घर हो
-
स्याङ्जाका नयाँ उद्योगमा ४८ करोड लगानी
-
वन विकासको बाधक होइन, समृद्धिको आधार हो
प्रतिक्रिया