निर्वाचन शान्तिपूर्ण बनाउन सबैसँग सहकार्यको अपेक्षा
स्याङ्जा ।
आगामी फागुन २१ गते हुने प्रतिनिधिसभा सदस्य निर्वाचनको तयारी स्याङ्जामा अन्तिम चरणमा पुगेको छ। जिल्ला प्रशासन कार्यालय स्याङ्जाले निर्वाचनलाई स्वच्छ, स्वतन्त्र, निष्पक्ष तथा भयरहित वातावरणमा सम्पन्न गर्न सुरक्षा तथा व्यवस्थापनका सम्पूर्ण तयारी पूरा गरिएको जनाएको छ। प्रशासनका अनुसार निर्वाचनलाई प्रभावकारी र शान्तिपूर्ण रूपमा सम्पन्न गराउन सुरक्षा संयन्त्र परिचालन, मतदान केन्द्रहरूको संवेदनशीलता मूल्याङ्कन, आवश्यक जनशक्ति व्यवस्थापन तथा मतदान सामग्रीको सुरक्षित ढुवानी र भण्डारण लगायतका तयारी सम्पन्न भइसकेका छन्। उम्मेदवार, मतदाता, मतदान कर्मचारी र मतदान सामग्रीको सुरक्षा सुनिश्चित गर्न विशेष योजना बनाइएको जनाइएको छ। निर्वाचनको दिन कुनै पनि अप्रिय घटना हुन नदिन सुरक्षा निकायहरूलाई उच्च सतर्कतामा राखिएको प्रशासनले स्पष्ट पारेको छ।
निर्वाचन आचारसंहिता र प्रचलित कानुनको पूर्ण पालना गराउँदै निर्वाचनलाई मर्यादित र शान्तिपूर्ण वातावरणमा सम्पन्न गराउन जिल्लामा क्रियाशील सबै राजनीतिक दल, उम्मेदवार, कर्मचारी, मतदाता, निजी तथा गैरसरकारी क्षेत्र, सञ्चारकर्मी र नागरिक समाजलाई प्रशासनले सहयोगका लागि अनुरोध गरेको छ। लोकतान्त्रिक अभ्यासको महत्वपूर्ण पर्वका रूपमा लिइने निर्वाचनलाई सफल बनाउन सबै पक्षको जिम्मेवार भूमिका आवश्यक रहने प्रशासनको भनाइ छ। यसैबीच, निर्वाचनको पूर्वसन्ध्यामा पर्ने फागुन १८ गते पहाडी जिल्लामा फागु पूर्णिमा (होली पर्व) को सन्दर्भमा प्रशासनले विशेष सतर्कता अपनाउन आग्रह गरेको छ। होली पर्वले सामाजिक सद्भाव र सांस्कृतिक एकताको सन्देश दिने भए पनि पछिल्ला वर्षहरूमा केही अवाञ्छित गतिविधि देखिएकाले मर्यादित र अनुशासित रूपमा पर्व मनाउन आह्वान गरिएको हो। प्रशासनले सम्पूर्ण स्याङ्जाबासीमा होलीको शुभकामना व्यक्त गर्दै परम्परा र संस्कृतिअनुसार सभ्य रूपमा उत्सव मनाउन आग्रह गरेको छ।
कसैको इच्छा विपरीत रंग लगाउने, मादक पदार्थ सेवन गरी सार्वजनिक स्थलमा होहल्ला गर्ने, झैझगडा वा भिडभाडजन्य गतिविधिमा संलग्न हुने जस्ता कार्य नगर्न प्रशासनले चेतावनी दिएको छ। यस्ता गतिविधिले सामाजिक सद्भावमा असर पार्नुका साथै आसन्न निर्वाचनको वातावरणमा समेत खलल पुर्याउन सक्ने भन्दै सचेत रहन अनुरोध गरिएको छ। सहायक प्रमुख जिल्ला अधिकारी प्रेम सुवेदीले धार्मिक तथा राजनीतिक सद्भावमा असर पर्ने कुनै पनि गतिविधि नगर्न र निर्वाचनको शान्त वातावरण कायम राख्न सबैलाई जिम्मेवार बन्न आग्रह गरेका छन्। उनले होली पर्वको समयमा पनि कानुन विपरीतका गतिविधि भएमा कडाइका साथ कारबाही गरिने स्पष्ट पारे।
होलीको अवसरमा निर्वाचन प्रचारप्रसार कार्यक्रम सञ्चालन गर्दा पनि सामाजिक सद्भाव कायम रहने गरी कार्यक्रम आयोजना गर्न राजनीतिक दल तथा उम्मेदवारहरूलाई प्रशासनले विशेष आग्रह गरेको छ। प्रचारका क्रममा उत्तेजनात्मक अभिव्यक्ति, एकअर्काप्रति आरोप–प्रत्यारोप, वा धार्मिक तथा जातीय भावनामा असर पर्ने गतिविधि नगर्न सचेत गराइएको छ। निर्वाचनलाई सभ्य र मर्यादित प्रतिस्पर्धाको रूपमा अघि बढाउन प्रशासनले सबै पक्षसँग सहकार्यको अपेक्षा गरेको छ। जिल्ला प्रशासन कार्यालयका अनुसार निर्वाचनको पूर्वतयारीअन्तर्गत मतदान केन्द्रहरूको भौतिक अवस्था अनुगमन, आवश्यक सामग्रीको आपूर्ति, कर्मचारी तालिम, तथा सुरक्षा निकायबीच समन्वय बैठकहरू सम्पन्न भइसकेका छन्। दुर्गम तथा पहाडी क्षेत्रका मतदान केन्द्रहरूमा सामग्री सुरक्षित रूपमा पुर्याउने योजना समेत तयार पारिएको छ। सम्भावित जोखिम क्षेत्रको पहिचान गरी त्यहाँ अतिरिक्त सुरक्षा व्यवस्थासमेत मिलाइएको जनाइएको छ।
प्रशासनले नागरिकलाई निर्वाचनको दिन शान्तिपूर्ण रूपमा मतदान प्रक्रियामा सहभागी हुन आग्रह गरेको छ। मतदातालाई मतदान केन्द्रमा अनुशासित रूपमा उपस्थित भई आफ्नो मताधिकार प्रयोग गर्न र कुनै पनि शंकास्पद गतिविधि देखिएमा तत्काल सम्बन्धित निकायलाई जानकारी गराउन अनुरोध गरिएको छ। निर्वाचन लोकतन्त्रको आधार स्तम्भ भएकाले यसको मर्यादा कायम राख्न सबै पक्षको सक्रिय सहयोग अपरिहार्य रहेको प्रशासनको धारणा छ। उल्लेखित विषय तथा प्रचलित कानुनको उल्लंघन भएको पाइएमा कानुन बमोजिम कारबाही गरिने जिल्ला प्रशासन कार्यालयले चेतावनी दिएको छ। सामाजिक सद्भाव, धार्मिक सहिष्णुता र राजनीतिक मर्यादा कायम राख्दै आगामी प्रतिनिधिसभा सदस्य निर्वाचन सफलतापूर्वक सम्पन्न गर्न प्रशासन दृढ रहेको जनाएको छ। निर्वाचन र होली पर्व एकै समयमा परेकाले उत्सव र लोकतान्त्रिक अभ्यास दुवैलाई सभ्य, सुरक्षित र अनुशासित ढंगले मनाउन तथा सम्पन्न गराउन प्रशासनले सबै स्याङ्जाबासीसँग सहकार्यको अपेक्षा गरेको छ।
नेपाल अपडेट
-
वालिङको सम्भावना उजागर गर्न ‘फस्ट एक्स्पो’
-
स्याङ्जाका प्रहरी प्रमुखले भने,‘ढुक्क भएर आफ्नो मताधिकार प्रयोग गर्नुहोस’
-
“सर्वसम्मत नेतृत्वबाट गण्डकीका व्यवसायीको आवाज बुलन्द गर्छु”
-
कृषि, पर्यटन र व्यापार प्रवद्र्धनका लागि वालिङ महोत्सव
-
‘कृषिमा आत्मनिर्भर बनाउन बजारको सुनिश्चितता आवश्यक’
-
भूपू विद्यार्थीको पुर्णामृत स्कुलमा सहयोग
-
सम्पादकीय— ‘भीरकोटका क्याम्पसलाई बचाऔं’
-
समावेशी विकास र पारदर्शिताको बाटोमा अर्जुनचौपारी
-
मानिस हराएको सूचना
-
कृषिमा न्यून बजेट— ‘स्याङ्जामा छुट्टाइएको बजेट खर्चमै समस्या’
प्रतिक्रिया