वालिङमा महिलालाई आत्मनिर्भर बनाउने अभियान
वालिङ ।
महिलालाई आर्थिक रूपमा सशक्त बनाउने उद्देश्यसहित स्याङ्जाको वालिङ नगरपालिका–११ मा बाख्राको बीउ पाठापाठी वितरण गरिएको छ। स्थानीय कागतीभञ्याङ स्वावलम्बी महिला बाख्रापालन समूहका सदस्यहरूलाई लक्षित गर्दै सञ्चालन गरिएको कार्यक्रममा २१ जना महिला सदस्यलाई बीउ पाठी तथा बोका उपलब्ध गराइएको हो। वालिङ नगरपालिकाले महिलालाई उत्पादनमुखी गतिविधिमा जोड्ने अभियानअन्तर्गत उक्त कार्यक्रम सञ्चालन गरेको जनाएको छ। कार्यक्रममार्फत ग्रामीण क्षेत्रमा रहेका महिलाहरूलाई आयआर्जनका अवसर सिर्जना गर्दै आत्मनिर्भर बनाउने लक्ष्य लिइएको छ।
कार्यक्रममा बोल्दै वालिङ नगरपालिकाका उपप्रमुख कविता तिवारी गैह्रेले नगरपालिकाले साना किसान तथा महिलालाई उत्पादनमा जोड्ने नीति लिएको बताइन्। उनले महिलाको आर्थिक सशक्तीकरणका लागि स्थानीय तहले विभिन्न योजनाहरू अघि बढाइरहेको उल्लेख गर्दै उत्पादनमुखी कार्यक्रमहरूलाई प्राथमिकता दिइएको बताइन्। उनले भनिन्, “साना किसान तथा महिलाहरूलाई उत्पादनमा जोड्ने अभियानका साथ नगरपालिका निरन्तर सक्रिय छ”। उपप्रमुख तिवारीले स्थानीय उत्पादनको बजारीकरणलाई सहज बनाउन ‘पैचो कार्यक्रम’ सञ्चालनको तयारी भइरहेको जानकारी दिइन्। उनका अनुसार नगरपालिकाभित्रका १४ वटै वडामा उत्पादित कृषि तथा पशुपालनसम्बन्धी वस्तुहरूलाई सहज रूपमा बजारसम्म पुर्याउने योजना बनाइएको छ। गाउँगाउँमा उत्पादन भएका सामग्रीको उचित बजारीकरण हुन सके उत्पादन वृद्धि हुने विश्वास पनि उनको छ।
कार्यक्रममा वडा नं. ११ का अध्यक्ष डण्डपानी पंगेनीले महिलालाई उत्पादनमा जोड्न बाख्रा वितरण गरिएको बताए। उनले ग्रामीण महिलाहरूलाई आर्थिक रूपमा सक्षम बनाउन साना किसानलाई लक्षित कार्यक्रम आवश्यक रहेको उल्लेख गरे। उनले भने, “साना किसानलाई उत्पादनमा जोड्न सके मात्रै महिलाहरू आर्थिक रूपमा सवल बन्न सक्छन् ।” ग्रामीण विकासका लागि महिलाको सक्रिय सहभागिता अनिवार्य रहेको उनको भनाइ थियो। उक्त कार्यक्रम ‘आर्थिक समृद्धिका लागि साझेदारी’ अभियानअन्तर्गत सञ्चालन गरिएको हो। “भोकालाई एक छाक भोजन होइन, जिउने जुक्ति सिकाऔँ” भन्ने मूल नारासहित वालिङ नगरपालिका, हेफर प्रोजेक्ट नेपालको आर्थिक सहयोग तथा दियालो संस्थाको व्यवस्थापनमा वालिङ कृषि विकास परियोजना सञ्चालन हुँदै आएको छ। सोही परियोजनाअन्तर्गत बीउका रूपमा बाख्राका पाठापाठी वितरण गरिएको नगरपालिकाले जनाएको छ।
नगरपालिकाका प्रमुख प्रशासकीय अधिकृत गंगालाल सुवेदीले बाख्राको नस्ल सुधार गरी आम्दानी वृद्धि गर्ने लक्ष्यका साथ पाठीसँगै बोका वितरण गरिएको जानकारी दिए। उनका अनुसार कृषकलाई उन्नत नस्लबारे सचेत गराउने र त्यसका लागि आवश्यक सहयोग उपलब्ध गराउने काम नगरपालिकाले गरिरहेको छ। परियोजनाअन्तर्गत लाभग्राही महिलाहरूलाई केवल पाठापाठी वितरणमा सीमित नराखी आवश्यक तालिमसमेत प्रदान गरिने बताइएको छ। परियोजनाकी कर्मचारी सुस्मिता पौड्यालका अनुसार महिलाहरूलाई आधुनिक बाख्रापालन, पोषण व्यवस्थापन, रोग नियन्त्रण तथा बजार व्यवस्थापनसम्बन्धी तालिम दिँदै उत्पादनमा जोडिने वातावरण सिर्जना गरिएको छ।
वालिङ नगरपालिकाको वडा नं. १ देखि १४ सम्म सञ्चालनमा रहेको उक्त परियोजनाले महिला तथा साना किसानलाई लक्षित गर्दै विभिन्न आयआर्जनमूलक क्रियाकलापहरू सञ्चालन गर्दै आएको छ। यसले ग्रामीण अर्थतन्त्रलाई चलायमान बनाउन र स्थानीय स्रोत–साधनको अधिकतम उपयोग गर्न महत्वपूर्ण भूमिका खेल्ने अपेक्षा गरिएको छ। स्थानीय तहबाट सञ्चालन गरिएका यस्ता कार्यक्रमहरूले महिलाको आर्थिक अवस्था सुधार गर्नका साथै उनीहरूको सामाजिक सहभागिता र आत्मविश्वास वृद्धि गर्ने विश्वास गरिएको छ। बाख्रापालनजस्ता व्यवसायमार्फत ग्रामीण महिलाहरूले आफ्नै गाउँमै आयआर्जन गर्न सक्ने सम्भावना बढ्दै गएको छ। समग्रमा, वालिङ नगरपालिकाको यो पहल महिलालाई आत्मनिर्भर बनाउने, ग्रामीण अर्थतन्त्र सुदृढ गर्ने तथा कृषि–पशुपालन क्षेत्रमा उत्पादन वृद्धि गर्ने दिशामा महत्वपूर्ण कदमका रूपमा हेरिएको छ।
नेपाल अपडेट
-
स्याङ्जामा हुट र छत राखेका सवारीसाधनलाई निशेध
-
स्याङ्जाका स्थानीयतहको आन्तरिक आय घट्दै
-
स्याङ्जाका स्थानीयतहको बेरुजु १३ करोड
-
गल्याङ बन्यो पूर्ण खोप सुनिश्चितता
-
‘सत्यम्’ का सर्जक वियोगी ‘राजस्थल युवा प्रतिभा सम्मान–२०८३’ बाट सम्मानित
-
सम्पादकीय— विकास अवरुद्ध नपार
-
वालिङको सम्भावना उजागर गर्न ‘फस्ट एक्स्पो’
-
स्याङ्जाका प्रहरी प्रमुखले भने,‘ढुक्क भएर आफ्नो मताधिकार प्रयोग गर्नुहोस’
-
“सर्वसम्मत नेतृत्वबाट गण्डकीका व्यवसायीको आवाज बुलन्द गर्छु”
-
कृषि, पर्यटन र व्यापार प्रवद्र्धनका लागि वालिङ महोत्सव
प्रतिक्रिया